Ibiheruka

Umurimo Yesu akorera Ahera cyane

Share

Ingingo y’ubuturo bwera bwo mu ijuru n’ibibukorerwamo ni icyigisho gikomeye muri Bibiliya (Abaheburayo 8:1), cyane cyane mu butumwa bwa malaika wa gatatu no mu mibereho y’umukristo nyakuri. Ni icyigisho gihishura inama y’agakiza n’urukundo rutarondoreka Imana yakunze umunyabyaha. Ni kigari cyane. Ubu tukimenyaho agace, ubumenyi bwacyo buzakomereza mu ijuru (1 Abakorinto 13:9-13).

Mbere y’uko umuntu amenya akanasobanukirwa ibikorerwa ahera cyane ho mu ijuru, ni ngombwa ko abanza gusobanukirwa n’ubuturo bwera bwo mu isi n’umurimo wabukorerwagamo, kuko ubwo ku isi bwari ipica (igishushanyo) y’ubwo mu ijuru. Mose yabwubatse akurikije uko yabitegetswe n’Imana (Abaheburayo 8:5; Kuba 25:8-9).

Dore imigabane y’ingenzi yari igize
ubuturo bwera bwo mu isi

Mu rugo: igicaniro cy’ibitambo n’igikarabiro

Ahera: ameza y’imitsima, igitereko cy’amatabaza, igicaniro cy’imibavu

Ahera cyane: isanduku y’isezerano irimo ibisate bibiri by’amategeko cumi, urwabya rwa manu, inkoni ya Aroni ipfunditseho uburabyo, ipfundikijwe umutemeri witwa SHEKINAH (cyangwa intebe y’imbabazi) iterwa igicucu n’abakerubi babiri.

Buri mugabane wose mu buturo ushushanya Yesu, kandi ufite icyo utwigisha mu nama y’agakiza.

Umugabane

Uko bwubatswe na Mose

Uko bishushanya Yesu

1

Urugo

Kuva 40:33

Yohana 10:1, 9

2

Igicaniro cy’ibitambo

Kuva 40:29

Abefeso 5:2

3

Igikarabiro

Kuva 40:30

Abefeso 5:26

Abaheburayo 10:22

4

Ameza y’imitsima

Kuva 40:22-23

Yohana 6:35

5

Igitereko cy’amatabaza

Kuva 40:24

Yohana 8:12

6

Igicaniro cy’imibavu

Kuva 40:26-27

Abefeso 5:2

7

Umwenda ukingiriza ahera cyane

Kuva 40:26-31

Abaheburayo 10:20

8

Isanduku y’isezerano

Kuva 40:20-21

Zaburi 40:8

9

Manu

Abaheburayo 9:4

Yohana 6:33, 51

10

Inkoni ya Aroni

Kubara 17:10 ;
Itangiriro 49:10

Ibyahishuwe 2:26; 19:15

 

Ubyitegereje neza, burya iyo Imana itagoboka umuntu, ibye byari bimurangiranye. Amaze kurya itunda ryabuzanijwe, ako kanya ubwiza yambitswe n’Imana bumutamururwaho. Umwambaro yawubonye habayeho kwicwa kw’itungo. (Itangiriro 3:6-7, 21).

“Adamu mu gusogota itungo rizira inenge ahindishwa umushyitsi no gutekereza ko icyaha cye kizatuma amaraso y’Umwana w’Intama w’Imana ameneka. Iyo pica (iyo shusho cyangwa ibyo bintu) iramukangaranya byimbitse, abona gukomera kw’icyaha cye kitagombaga guhongererwa n’ikindi kintu uretse urupfu rw’inkoramutima y’Imana. Maze Adamu atangazwa n’ubwo bugiraneza butagira akagero bw’uwiyemeje guha umunyabyaha inshungu imeze ityo. Inyenyeri y’ibyiringiro guhera ubwo imurikira ahazaza hari agahinda n’ubwigunge.” (Patriarches et Prophètes, p. 46)

Guhera icyo gihe umunyabyaha yaboneraga inshungu y’ubugingo bwe mu gitambo akizera ko ibyaha bye byagishyizweho maze akabonera imbabazi muri Kristo wasezeranywe. Uko kwijijisha kw’Imana gutuma yemera ko itungo rizira igicumuro cy’umuntu rigasogotwa mu kigwi cy’uwishe itegeko, rikabura ubugingo ritacumuye, ngo uwacumuye ari we ubuhabwa. Aho ni ho urukundo rutarondoreka rw’Imana rwagaragariye rurenze ubwenge bw’umuntu. (Yohana 3:16; Abaroma 8:32, 11:33; Itangiriro 8:20; 15:9-10; 35:1, 7). Uhereye kuri Adamu, Seti, Nowa, Aburahamu, Isaka na Yakobo, igitambo gishushanya Yesu cyakomeje kuba uruhererakane ku bubaha Imana. Abisirayeli bavuye muri Egiputa bageze mu butayu Imana ibategeka kubaka ubuturo bwera (Kuva 25:8-9) kugira ngo gutamba ibitambo bibe gahunda ya buri munsi na buri mwaka yo kubibutsa kwiyunga n’Imana (Abalewi 4:1-35).

Ubuturo bwera bukimara gushingwa mu butayu, hatoranijwe umuryango wa Lewi mu birebana n’umurimo wo mu buturo, inzu ya Aroni itoranirizwa umurimo w’ubutambyi. (Kubara 1:49-53; Kuva 28:1…; Abalewi 8:1…).

Iyo Umwisirayeli yacumuraga ku Mana cyangwa kuri mugenzi we, yazanaga itungo ritagira inenge (ikimasa, ihene, intama, inuma cyangwa intunguru), maze itungo akarirambikaho ikiganza ku mutwe, akaba arigeretseho ibyaha bye, akarisogotera imbere y’umutambyi rikaryozwa bya byaha, umuntu akabarwaho gukiranuka (Abalewi 17:11; Abaheburayo 9:22; Tragédie des siècles, p. 473).

Uko ni ko byagendaga ku munyabyaha n’igitambo, noneho reka twimukire ku ngingo y’umutambyi n’igitambo. (Abalewi 17:5-6). Nguku uko imbabazi z’Imana zimuraga ibyaha by’uwacumuye kugira ngo akire :

Iyo umunyabyaha yarambikaga ikiganza ku itungo akarivugiraho ibyo yakoze afite umutima umenetse, ibyaha bye byamuvagaho bikajya ku itungo. Iyo yaryīcaga yabaga yīzinutswe bikitwa ko ari we upfuye. Iyo umutambyi yafataga amaraso y’icyo gitambo yabaga yashyizeho ibyaha bya nyir’igitambo, no kurya ku nyama zacyo (Abalewi 10:17), yayajyanaga mu buturo bwera akaba yimuriye ibyaha imbere y’Imana n’amategekko yishwe.

“Amategeko y’Imana yishwe yasabaga urupfu rw’uwayishe, amaraso nk’ikigereranyo cy’ubugingo bw’umunyabyaha ari bwo bwikoreye gukiranirwa, yinjizwaga n’umutambyi ahera akaminjagirwa imbere y’inyegamo ikingirije amategeko yishwe. Binyuze muri uwo muhango, icyaha cyabaga cyimuriwe mu buturo bwera n’amaraso mu buryo bw’ikigereranyo.” (Tragédie des siècles, p. 453).

Uwo ni wo murimo wakorwaga uko bukeye n’uko bwije, umwaka wose. Ni ko ibyaha bya Isirayeli byashyirwaga mu buturo bwera. Byasabaga gukurwamo hakoreshejwe umuhango udasanzwe. Imana yari yarashyizeho gahunda yo kwezwa kw’imigabane yombi y’ubuturo bwera (Abalewi 16:16, 19).

Umunsi w’ihongerero, tariki ya 10 z’ukwezi kwa Karindwi buri mwaka, wari umunsi wo gukuraho ibyaha mu buturo bwera, byabaga bihamaze umwaka wose.

  • Ku bw’itegeko ry’Imana, uwo munsi w’ihongerero wari umunsi ukomeye cyane
  • Byasabaga Umwisirayeli wese guteranira ku Ihema ry’Ibonaniro uhereye ku Mwami ukageza ku mukene nyakujya
  • Byasabaga kwiyeza, kwicunūza, kwibabaza umutima uhereye ku mutambyi mukuru ukageza kuri rubanda rusanzwe. Biyirizaga ubusa, imirimo yose igashyirwa ku ruhande (Abalewi 16:29-30, 24)
  • Wari umunsi w’injyanamuntu, kuko byasabaga kwemerwa n’Imana ukagira amahoro, cyangwa kutemerwa na yo ugakūrwa mu bayo (mu Bisirayeli)

Abisirayeli bazanaga ihene ebyiri, hakoreshejwe ubufindo, hakaboneka ishushanya Yesu n’ihagarariye Satani (Azazeli). Umutambyi mukuru akabanza kwihongerera n’umuryango we. Nyuma agafata ya hene ishushanya Yesu igashyirwaho ibyaha by’Abisirayeli byicujijwe mu mwaka wose, akabyinjirana ahera cyane binyuze mu maraso ya ya hene, agahongerera Abisirayeli imbere y’isanduku y’amategeko bishe. Ubwo Abisirayeli bose babaga bategereje bafite ubwoba, buri wese ahanze amaso n’umutima igisubizo kiri buzanwe n’umutambyi.

Iyo umutambyi yasohokaga mu buturo bwera, Abisirayeli bamuzaniraga ya hene yasigaye ari nzima (Azazeli), akayaturiraho gukiranirwa n’ibicumuro by’Abisirayeli byose arambitse ibiganza bye mu ruhanga rwayo, ikōhērwa mu butayu ubutazagaruka (Abalewi 16:21-22 ; Tragédie des siècles, p. 454).

Iyo hene yo kōhērwa umutambyi yayishyiragaho ibyaha by’Abisirayeli bīhannye ibyaha byabo, bikagezwa ahera cyane bagatsindishirizwa. Ni byo byashyirwaga ku ihene yo kōhērwa. Naho ibitihanwe cyangwa byihanwe bya nyirarureshwa bigashyirwa kuri nyirabyo akabiryozwa, akavumwa, agakurwa mu Bisirayeli.

“Ibyakorerwaga nk’igishushanyo mu buturo bwo ku isi, ni byo biri gukorwa mu buryo nyakuri mu buturo bwo mu ijuru.” (Tragédie des siècles, p. 455 ; Abaheburayo 9:24).

Imirimo inyuranye Kristo akorera ahera cyane

Nk’uko umutambyi yatambaga ibitambo bya buri munsi abikorera ahera, akinjira ahera cyane rimwe mu mwaka, ni na ko Yesu amaze kuzamuka mu ijuru yakoreye mu mugabane wa mbere w’ubuturo bwera (Ahera), maze mu iherezo ry’iminsi 2300 (Daniyeli 8:14), ariho mu mwaka wa 1844, yinjira mu cyumba cya kabiri (Ahera cyane) kweza ubuturo bwera, no guhongerea abamwizeye bose (Abaheburayo 9:11-12).

“Mu binyejana cumi n’umunani Yesu yakoreye umurimo w’ubutambyi bwe mu cyumba kibanzirizwamo cy’ubuturo bwera, amaraso ye yaburaniye abizera bīhana, abaha ubwishingizi bw’imbabazi no kubahuza na Se… Ariko ibyaha byabo byakomeje kuba mu bitabo byo mu ijuru. Nk’uko mu muhango wa Mose umwaka wasozwaga n’umurimo w’ihongerero, ni ko n’umurimo w’Umukiza wo gucungura abantu washojwe n’igikorwa cy’ihongerero gifite intego yo guhanagura ibyaha mu buturo bwera bwo mu ijur.” (Tragédie des siècles, p. 456).

Kuva mu mwaka wa 1844, Yesu ari Ahera cyane (Daniyeli 7:10, 13-14 ; Ibyahishuwe 11:19) akorera umunyabyaha iyi mirimo ikurikira :

  • Umutambyi
  • Inshungu
  • Umuhuza
  • Umucamanza
  • Umurengezi

Nk’uko Abisirayeli bahangaga amaso yabo ku buturo bwera, ni ko natwe dusabwa guhanga amaso yacu mu ijuru (Abakolosayi 3:1; Luka 2:28).

Umuntu akimara gucumura, Yesu yiyemeje mu nama y’agakiza kwitambikira umunyabyaha imbere ya Se, ngo aryozwe ibyaha bya mwene muntu atagizemo uruhare, maze yitwa umunyabyaha nta kibi yakoze, kugira ngo umunyabyaha umwizeye yitwe umukiranutsi nta cyiza yakoze. Uko ni ko yatubereye Umutambyi, atabitorewe n’abantu. (Abaheburayo 6:19-20; 5:5; 7:24-27).

  • Yesu ni we Nshungu yacu. Iyo twemeye ibyaha byacu, tukīzinukwa, uwo mwanya Yesu atubera inshungu. Twahamagazwa mu rubanza, akitaba mu mwanya wacu, agahabwa igihano cyari kidukwiriye (Abagalatiya 3:13 ; 1 Timoteyo 2:6).
  • Iyo tuganyishwa n’ububi, ubutebyi n’ingege nke, yakira iyo mitwaro yacu akadusabira imbabazi ku Mana yitwaje amaraso ye akatubera UMUKIZA.
  • Iyo umenye ko uri umuntu waguye wa kamere, utagira icyiza kimurimo, ukamutegaho amakiriro, aguhuza na Se, akagukiza umutima wīcira urubanza, muri ubwo buryo akakubera UMUHUZA. (1 Timoteyo 2:5)
  • Iyo Satani, abantu be hamwe n’ibyongorero by’abadayimoni bitangiye umurimo wo kukurega no kukurebuza bavuga intege nke, ibyaha n’amakosa yawe bakaguca intege no kuguciraho iteka, ukamwerekezaho amaso wiyambuye kwirengera no kwitsindishiriza, akubera UMURENGEZI kuri Se (Mika 7:7).

Yesu afite n’undi murimo : ni We wahiswemo n’Imana kuba Umucamanza (Ibyakozwe 17:31). Yesu adukorera imirimo idashobora gukorwa n’Umutambyi upfa, kuko bitumvikana mu bisanzwe uko umuntu umwe yaba Umucamanza (Juge) n’Umuvugizi (Avocat). Ariko Yesu kuko ashobora byose adukorera iyo mirimo yombi, iyo tumwizeye.

Abantu benshi bibeshya ko bazacirwa urubanza isi irangiye, kuko batazi ko urubanza kangēnzuzi rwatangiye, kandi ko Yesu nagaruka azaba ari ugusomerwa. Ku bw’ibyo, dukwiriye kumenya ko ibyo dukora, ibyo dutekereza, ndetse n’inyifato byacu byandikwa na malaika udasobwa. Icyifuzo cyacu, ni ugukura abantu mu bitotsi byo kwibeshya ko turi mu gihe cy’ubuntu gusa, kandi ibyacu biri gufatirwa imyanzuro idasubirwaho mu buturo bwo mu ijuru. (Yesaya 32:16-17; Umubwiriza 3:17 ; 2 Abakorinto 5:10).

Impamvu idutera kwandika ibi, ni koko ni inshingano ya buri wese wemera Imana, ariko dushaka no kwirinda kuba :

  • Abigisha b’ibinyoma
  • Abahanuzi b’ibinyoma
  • Abigisha ibyo badakora
  • Abahisha bagenzi babo ukuri.

Kuko izi ari zo nzira enye abigisha bazacirwamo urubanza (Yakobo 3:1).

Uhereye mu mwaka wa 1844, Yesu amaze kwinjira Ahera cyane, ni ho umurimo w’ihongerero watangiranye n’imirimo ikomeye y’ingenzi itandukanya imikorere y’Imana n’iya Satani, kugira ngo umwana w’umuntu abone uko yihitiramo icyiza cyangwa ikibi agikunze. (Malaki 3:18). Iyo mirimo ikubiye muri ibi bikurikira :

  • Igihe cy’ubutumwa buheruka bw’imbabazi
  • Gushyira ahagaragara gukiranuka kw’Imana n’ubutabera bwayo
  • Kwerekana urubanza : ikemurarubanza ku bapfuye n’urubanza kagenzuzi ku bakiriho
  • Gushyirwaho ikimenyetso cy’Imana cyangwa icy’inyamaswa.

Iyo umutambyi mukuru yabaga ari Ahera cyane mu gihe cya Isirayeli ya kera, buri wese yagombaga kwibabaza umutima. Ni na ko natwe dusabwa gutegereza dutinya (1 Petero 1:17).

“Igihe cy’imbabazi kigiye kurangira. Umunsi ku wundi umurage w’abantu uri gushyirwaho ikimenyetso… Dukwiriye kumenya ko kubaho kwacu kwihutana ihubi, kandi ko nta mutekano dufite n’akanya na gato, igihe cyose ubugingo bwacu butarahishanwa na Kristo mu Mana » (Messages choisis, vol. 1, p. 222, 1SM, p. 190).

Isaha n’igihe tutazi, umurimo Kristo akorera Ahera cyane ushobora kurangira. N’ubwo Yesu akomeje guhendahendera umunyabyaha ku Mana agira ati : Bababarire, bababarire akanya gato ; ariko bidatinze imiyaga izarekurwa, urusengero rwo mu ijuru rwuzure umwotsi (Ibyahishuwe 15:8), bisobanuye ko umurimo w’ubuhuza uzaba urangiye. Ubwo ni bwo abanyabyaha batihannye n’abayoberejwe mu binyoma n’ibihimbano bazakubita hirya no hino bashaka Ijambo ry’Imana, ariko igihe kizaba cyararangiye, bazabwirwa amagambo ateye ubwoba ngo « MWARAKEREREWE, MWARAKEREREWE CYANE. »

Musomyi nkunda, gira bwangu Yesu yakire ibyawe atarasohoka !

Igitekerezo kimwe

  1. Murakoze cyane kutwibutsa igihe cy'urubanza turimo no kutwibutsa ibyo Yesu adukorera ahera cyane

Leave a Reply

Your email address will not be published. Required fields are marked *

*