Ibiheruka

GUSHYIRWAHO IKIMENYETSO

Share

Gushyirwaho ikimenyetso cy’Imana ihoraho

Kubera intambara ikomeye yabereye mu ijuru hagati ya Kristo na Satani, yatumye mu ijuru haba imitwe ibiri : abayobotse Imana bitwa abamalaika bera, naho abayobotse Satani bitwa abadaimoni. (Ibyahishuwe 12:7).

Satani amaze gutsindwa aracibwa, ajugunywa mu isi, yibasira ikiremwa muntu, maze agusha umuntu mu cyaha cyo kunyuranya n’Imana. Uhereye icyo gihe iyo mitwe yombi ihora isibanira mu isi, bikagaragarira muri ibi bikurikira :

  • Ukuri n’ibinyoma
  • Umucyo n’umwijima
  • Icyiza n’ikibi
  • Gukiranuka no gukiranirwa
  • Kwihana no kwinangira
  • Urukundo n’ubugome

Mbere y’uko isi irangira, Imana na Satani bagomba kuvāngūra ab’Imana bagomba gushyirwaho ikimenyetso mu mico no mu myizerere. Maze bizabatandukanya n’isi imaze kuyoba no kononekara bikabategurira kwimurirwa mu ijuru (Malaki 3:16-18).

Ikimenyetso cy’Imana mu myizerere

Ikimenyetso cy’Imana ni iki ? Ikimenyetso cy’Imana ntikigaragarira amaso y’abantu, ahubwo ni ugukunda ukuri ukagukomereramo, akaba ari ko kuyobora imibereho yawe.

Ubutegetsi bwose bugira amategeko abugenga. N’ubutegetsi bw’Ingoma y’Imana bugendera ku mategeko yayo icumi, muri yo ISABATO yo mu itegeko rya kane ni cyo kimenyetso.

  • cy’uwatanze ayo mategeko (Kuva 20:11)
  • kiri hagati y’Imana n’abantu bayo (Kuva 31:17)
  • cy’ivugurura ry’ukuri (Yesaya 58:13)

Isabato tuvuga si bya biruhuko abantu bihitiyemo cyangwa ngo ibe Dimanche, umunsi wemewe kandi ukayobokwa n’imbaga nyamwinshi, ahubwo ni ISABATO y’umunsi wa karindwi (Samedi), yashyizweho n’Imana imaze kurema isi (Itangiriro 2:1).

Iyo Isabato yubahirizwa neza nk’uko Imana ibishaka, ntabwo ku isi hari kuboneka abantu basenga ibigirwamana (ibiti, amabuye, inyamaswa, abantu), kuko Isabato yibutsa abantu Umuremyi wabo, kandi nta muntu uzi ubwenge wakwitiranya ibiremwa n’Uwabiremye. (Abaroma 1:20, 23). Ntihari kuboneka n’abavuga ko Imana itabaho (Zaburi 14:1).

Mu ngingo zigize ubutumwa buheruka bw’ukuri bwagenewe iki gihe, harimo no gusubiza Isabato agaciro kayo imbere y’ab’isi n’ab’Itorero, kuko Satani yayībasīye aturutse impande zose, kugira ngo akure abantu mu butegetsi bw’Imana.

  • Isabato Satani yayisimbuje icyumweru (Dimanche)
  • Abayemera abatera kuyiruhuka igice
  • Abandi abatera kuyongerera ibitaravuzwe n’Imana bigatuma bayangisha abatizera
  • Abasigaye Satani yabahaye inama ati “iminsi yose ni kimwe, waruhuka uwo ushaka cyangwa ukayikoraho yose.”

Imana ifite icyerekezo kimwe, ingoma itagira amacakubiri, n’umunsi umwe w’Isabato yageneye abayubaha bose. Naho Satani yacanganyikishije abantu abaha iminsi inyuranye y’ibiruhuko. Abakristo benshi baruhuka ku cyumweru (Dimanche), abatemera Yesu bakaruhuka ku wa gatandatu (Vendredi), abatemera Imana bakaba ku isi batagira umunsi w’ikiruhuko. Ibyo si igitangaza, kuko ingoma ya Satani ihame rikuru riyigenga ari amacakubiri, kudahuza n’imivurungano. (1 Abakorinto 14:33 ; Yakobo 3:14-15).

Kwizera hamwe n’Isabato ni ikiruhuko cy’umubiri n’umutima Imana yageneye umuntu muri iyi si, kikaba ari igicucu cy’ikiruhuko cyuzuye tuzabonera mu ijuru. (Abaheburayo 4:9-11).

Reka tumenere ibanga abitwaza Isabato yonyine ko umuntu wiba, akica, usambana cyangwa akabeshya no kwifuza, n’indi mico mibi inyuranye n’ubushake bw’Imana, Isabato yonyine idashobora kumubera ikimenyetso hagati ye n’Imana. (Yeremiya 7:8-11). Amategeko y’Imana ameze nk’umunyururu. Iyo ucumuye rimwe, uba uyacumuye yose (Yakobo 2:10).

“Igihe malaika murimbuzi yiteguraga kunyura mu gihugu cya Egiputa kugira ngo yice imfura z’abantu n’iz’amatungo, Abisiraeli bararikiwe gucyura abana babo mu mazu yabo, no gushyira amaraso ku nkomanizo z’imiryango y’amazu yabo, kandi nta n’umwe wagombaga gusohokamo, kuko uwo ari we wese wari gusangwa mu Banyegiputa yari kurimburanwa na bo…

Na none kandi, malaika murimbuzi agomba kongera kunyura mu gihugu, ikimenyetso kizashyirwa ku bwoko bw’Imana. Ikimenyetso ni ugukomeza Isabato Yera. Ntitugomba gukurikiza ubushake bwacu n’uko tubona ibintu maze ngo twibwire ko Imana izatwemera. Nyagasani asuzuma kwizera kwacu adusaba gusohoza inshingano zacu niba dukeneye ko aturengera. Atubwira ibyo adusaba, amasezerano yayo azadusohorezwa. Ariko abahangara gusuzugura amabwiriza yayo, kugira ngo binyurire mu nzira bihitiyemo, bazarimburanwa n’ababi igihe amateka y’Imana azagenderera isi (Ibihamya, vol. II, p. 217).

“Nabonye ko Isabato Yera ari urukuta kandi izakomeza kuba urusīka rutandukanya Isiraeli nyakuri y’Imana n’abatizera, kandi ko Isabato ari ukuri gukomeye kuzahūza imitima y’abana b’Imana.” (Premiers écrits, p. 33).

Ikimenyetso cy’Imana mu mico

Gushyirwaho ikimenyetso mu mico kugaragarira muri ibi bikurikira :

  1. Mu gutsindishirizwa no kwizera (Zekariya 3:4-10)
  2. Mu guhabwa Umwuka Wera (Abefeso 1:13)
  3. Mu kubabazwa n’ibizira bibera ku isi (Ezekiyeli 9:4)

Bene aba ni bo mbata z’Imana zishyirwaho ikimenyetso. (Ibyahishuwe 7:2-3).

Dore bimwe mu biranga abazashyirwaho ikimenyetso mu buzima bwabo bwa buri munsi :

  1. Bagira umuhati, umutima wihangana, kwizera no kwiringira Imana
  2. Bababazwa n’ibyaha byabo n’ibya bagenzi babo, bakamamaza amagambo y’ubugingo, y’umuburo, gucyaha no kwinginga
  3. Bababazwa no kubona iby’Imana bisuzuguwe, abantu bagundiriye ishusho yo kwera batwikiriye ibibi bagatsindishiriza icyaha
  4. Bashavuzwa no kubona iyobokamana ryanzwe mu ngo z’abari bafite umucyo mwinshi no kubona ubugugu, ubwibone, kwikubiraho, ibinyoma by’uburyo bwose byarazahaje Itorero, bigatuma rihinyura Umwuka w’Imana ushinzwe gucyaha, maze bigaha intsinzi abakozi ba Satani, Imana igakozwa isoni, ukuri kugahinduka imburamumaro (Soma Témoignages, vol.2, p. 72, 73).
  5. Abazashyirwaho ikimenyetso cy’Imana ni abasa na Yesu mu mico
  6. Abashyirwaho ikimenyetso ni abatsinze isi, umubiri n’abadaimoni (Soma Evénements des derniers jours, p. 222, 223)

Ibiranga abatazashyirwaho ikimenyetso cy’Imana (Ezekiyeli 13 :8-10)

  1. Ikimenyetso cy’Imana ntikizashyirwa mu ruhanga rw’umugabo cyangwa umugore banduye
  2. Ntikizashyirwa ku ruhanga rw’umugabo cyangwa umugore urarikira cyangwa akaba uw’isi
  3. Ntikizigera gishyirwa ku ruhanga rw’umugabo cyangwa umugore ubeshya cyangwa w’umunyabinyoma, kuko abazashyirwaho ikimenyetso cy’Imana bagomba kuba nta kizinga imbere y’Imana ari abakandida nyakuri b’ijuru (Témoignages, vol. 2, p. 79)
  4. Ikimenyetso cy’Imana ntikizashyirwa ku bantu batababazwa n’ubutindi bwabo bw’iby’Umwuka cyangwa ngo banihishwe n’ibyaha by’abandi
  5. Abagirana ubucuti n’isi bakarya kandi bakanywa basangira n’abasinzi, bazarimbukana n’abakiranirwa. « Mbese twaba turi kurwana urugamba tubifashijwemo n’imbaraga zose twahawe n’Imana kugira ngo tugere ku rugero rushyitse rw’igihagararo cy’abagabo n’abagore muri Kristo ? Mbese aho twaba dushakisha kūzura kwe, tugera ku migambi irushaho kwisūmbura, twihatira kugera ku rugero rushyitse rwo kubonera kw’imico ye ? Igihe abagaragu b’Imana bazagera kuri iyi ntambwe, bazashyirwaho ikimenyetso mu ruhanga rwabo. Malaika ubarura azavuga ati ‘Birarangiye !’ Abantu be binyuze mu irema no gucungurwa bazaba buzuriye muri we. » (Evénements des derniers jours, p. 223; 3SM, p. 427 (1899)).

Gushyirwaho ikimenyetso byaratangiye, kandi birakomeje, binyuze mu butumwa bwa makaika wa gatatu. Birakorwa mu gihe isi yugarijwe n’imyivumbagatanyo ya politiki, intambara, umwiryane, ibyorezo n’ubukene. Abantu bahugiye mu iterambere n’iby’ikoranabuhanga, bari mu binezeza no mu busambo barwanira imyanya ikomeye. Muri icyo gihe abana b’Imana bariho bashyirwaho ikimenyetso cy’Imana mu mico n’imyizerere. Muri urwo rudubi rumeze rutyo, ni ho Imana ivugira ibyo ishaka ku Bantu bayo. Ikibabaje ni uko abantu bahugiranye, ntibazi ibiri gukorwa na gahunda idahusha y’Imana.

“Nyagasani yanyeretse akaga turimo, ku bwo kwemerera ubwenge bwacu bukuzurwamo n’intekerezo mbi hamwe n’amaganya y’isi. Nabonye ko bamwe batera umugongo ukuri kw’iki gihe bakareka gukunda Bibiliya bitewe no gusoma ibitabo bikangura umubiri. Abandi bahugiye mu kwibaza ibyo bazarya bazanywa n’ibyo bazambara. Hari n’abandi bategereje Yesu ariko mu gihe gishyize kera cyane. Kuri bo igihe cyaratinze cyane kuruta uko bari babyiteze, ku bw’ibyo bizera ko ibyo bizamara imyaka myinshi. Uko ni ko intekerezo zabo zateshuka ku kuri kw’iki gihe barundukira mu by’isi. Nabonye ko aho hari akaga gakomeye, kuko iyo intekerezo zuzuyemo ibindi, ukuri kw’iki gihe kuzirukanwamo ku buryo mu ruhanga rwabo hatazasigara umwanya wo gushyirwaho ikimenyetso cy’Imana Ihoraho.

Imyanya yo kwinezeza kwacu yagombye gukoreshwa mu gusoma Bibiliya, kuko ari yo izaducira urubanza mu minsi iheruka. (Premiers écrits –Inyandiko z’ibanze, p. 58).

Leave a Reply

Your email address will not be published. Required fields are marked *

*